Mar 15 | HUI | STEP | Egerebagiore hayagolaloma binigo mo miaga haguane biarubiagali ala hene miniwi biarubiMana lowinigo lawai haga biarubiGanisolo agali bibahende biarubi urunime te lalu hene. Tigua Yasu pu senime hende howa Pailate hearia haru pene.

a 15.1Lg 22.66

b 15.2Md 27.11

c 15.5Ais 53.7, Mg 14.61

d 15.11Ab 3.13-14

e 15.21Lm 16.13

f 15.24Iba 22.18

g 15.27-28Ais 53.12

h 15.29Iba 22.7, 109.25, Mg 14.58, Yo 2.19

i 15.33Amo 8.9

j 15.34Iba 22.1

k 15.36Iba 69.21

l 15.38Har 26.31-33

m 15.40-41Lg 8.2-3

n 15.42-43Lg 2.25, 2.38

Mark 15

Yasu Pailate hearia haru penego ogo

(Madiu 27.1-2,11—14, Lugu 23.1-5, Yone 18.28-38)

1 Egerebagiore hayagolaloma binigo mo miaga haguane biarubiagali ala hene miniwi biarubiMana lowinigo lawai haga biarubiGanisolo agali bibahende biarubi urunime te lalu hene. Tigua Yasu pu senime hende howa Pailate hearia haru pene. ^a 2 Haru ibiyagola Pailatehanda Yasuhondo lalu, Yu wali agalinaga handame haga kini í̠ kebe, lene. ^b

Ani layagola ibugua ladai bialu lalu, Í̠na o laregonigo, lene.

3 Loma binigo mo miaga haguane biarume lalu, Ibu ko dewa biya, lene. 4 Ani layagola Pailatehanda ibuhondo halu mende lalu, Ladai nabule dege kegonibe. Tigua í̠na ko dewa birigo layago hale haribe be nahebe, lene.

5 Ani layagola Yasu ibu ladai nabiyagola Pailate ibu miniha mogo lowa Yasuni handaya hene. ^c

Yasu homelo ba, lenego ogo

(Madiu 27.15-26, Lugu 23.13-25, Yone 18.39-19.16)

6 Bolangua Halu Penegonaga Tomo nolene horo harangi agali mbira garabaya kagola wali agalime, Gola, laragola Pailatehanda golaga hene. 7 Agali maru gabumane baba wai biyagola garabaya binigo mbira mini Barabasa hene. Ibugua agali homelo bayagola garabaya bini. 8 Horo ogoningi wali agalime Pailate hearia puwa ibuhondo lalu, Í̠na ala birilidagua áyu bibelo, lene. 9 Ibugua tihondo lalu, Yu wali agalinaga Handame Haga Kini kago gololiya hamelo kamibe, lene. 10 Loma binigo mo miaga haguane biarume henge lowa Yasu ibu hearia minu yalu ibiyagoni manda buore howa Pailatehanda ani lene.

11 Wali agalime, Barabasa gola, lelonaga Loma binigo mo miaga haguane biarume mo la hene. ^d 12 Pailatehanda tihondo lone lalu, Yu wali agali kamirunaga Handame Haga Kini ka larimigo ibuhondo i̱na agi buabe, lene.

13 Ani layagola tigua lone dalimu lalu, Ibu homelo ira bangani ba para habe, lene.

14 Ani layagola Pailatehanda tihondo lalu, Ibugua ko mbira agi biyiyabe, lene.

Ani layagola tigua hongo howa dalimu lalu, Ibu homelo ira bangani ba para habe, lene.

15 Ani layagola Pailatehanda wali agali biaru turu helo Barabasa golope howa ibugua ami agali hearuhondo, Yasu tibume balu ibu ira bangani homelo ba para hole haru pudaba, lene.

Ami agalirume Yasu mege binigo ogo

(Madiu 27.27-31, Yone 19.2-3)

16 Ami agali biarume gabumane haru haganaga anda pabe tamuhayagi Yasu haru anda puwa ami agali bibahende hearu mo ngoai hene. 17 Mo ngoai howa tigua labolabo luni tagalitayabi Yasu karula howa pu aniheme bo buwa ibu haguaneni karula hene. 18 Tigua gi hondone do lowa lalu, Yu wali agalinaga Handame Haga Kini haabo habelo, lene. 19 Ani lowa tigua ibunaga haguaneni gewame balu hamiaga tolo ba howa mine halu lalu, Í̠ timbuni ke, lalu bulu paligi bini. 20 Ani mege bialu howa tigua labolabo tagalitayabi biago golowa ibuninaga labolabo karula hene. Ani buwa tigua ibu ira bangani ba para hole tagira haru pene.

Yasu ira bangani ba para henego ogo

(Madiu 27.32-44, Lugu 23.26-43, Yone 19.17-27)

21 Ti harigani pialu hearia Sairiniali mbira mini Saimono ibu Aleganda Lubasala aba biago Yarusaleme ogoniha áyu dege anda ibalu hearia lola hene. Ibu lola howa ibu Yasunaga ira banga yilo ami agali biarume ibuhondo, Ya ya, dege layagola mo ya hene. ^e 22 Tigua Yasu haru pialu dindi mini Gologoda pene. Gologoda inanaga bi lalu, Haguane Kuni. 23 Puwa tiguawaini ibabi ira mbiranaga ibane minimuwebi mandagi bimaga ho berelenego ibu nelo miyagola ibu nane wahene. 24 Ani buwa tigua ibu homelo ira bangani ba para hene. Ibunaga labolabo ai ibu mo harabe hondole tadu bialu berene. ^f 25 Yasu homelo ira bangani ba para hayago egerebagi ni do paya biyagola ba para hene. 26 Tigua ibu ko biya lowa beba mbirani, Yu wali agalinaga Handame Haga Kini ogoni, gili buwa ira banga daligani ba para hene. 27 Ani buwa tigua agali ko biaga kirali Yasu heba mandagi mendego gi tigahayagi mendego gi lehayagi lowa ti ira banga tebirani ba para hene. ^g [ 28 Ani biyagome Anduane Homogonagambugani bi lo ngago ogo, Ibugua ko biaga heba pani nene, lalu gilibu winidagua lola hene.]

29 Wali agali ti bolangua haga bialu piyarume Yasuhondo ma bonge laga bialu tongoyongo bi laga bialu lalu, E̱he. Anduane Homogonaga anda gialope halu horo tebira howa bia dai bulebero, larigo í̠da. ^h 30 Í̠ni nahomolenaga í̠ni pele mialu ira banga ogoriani howa dalerene, lene.

31 Ogonidagua dege loma binigo mo miaga haguane biarubiMana lowinigo lawai haga biarubi tini laga laga bialu Yasu mege bialu lalu, Wali agali maru nahomelonaga pele mialu kaligodago ibuni pele namibehedane wiaruabe. 32 Ina de hondoloma̱yabi ibuhondo mini mbiraore wuluma̱yabiMbirali Dabo Helenego Isaraele wali agali kamarunaga Handame Haga Kini kago ira bangani howa áyu ogoni dalilo, lene.

Ani layagola agali kira Yasu heba ira bangani ba para hayago labomebi ibuhondo mege dege bini.

Yasu tongolo minigo ogo

(Madiu 27.45-56, Lugu 23.44-49, Yone 19.28-30)

33 Horombe hanuniore howa dindi ogoriani aruma ho wiane alendo ni gai layahayagi wá ho dai bini. ⁱ 34 Ani biyagola Yasuhanda bi hongo howa lalu, Eloi Eloi lema sabagadanai. Inanaga bi lalu, I̱naga Ngode Datagaliwabe-o i̱naga Ngode Datagaliwabe-o i̱ aginaga wahalu piribe, lene. ^j

35 Bi layago hale howa wali agali maru ogoniha hearume lalu, Ibugua Elaya olaruago hale hadaba, lene. 36 Mbiragome gerai lalu puwawaini iba kaubi bereagoha mbirale tara dahundu ale ibira howa waini iba biru to̱leagola ira nguinini mo gedo howa Yasunaga ne hambuni ngelene. Ngelowa agali biagome lalu, Elayahanda ibu ira bangani howa golope hole ibirabe handami̱ya, lene. ^k

37 Yasu ibu bi dalimu lowa buhe̱ ereba halu tongolo mini.

38 Tongolo miyagola Anduane Homogonaga andaha labolabo timbuni gerela ho winigo daligani howa buda ki hene. ^l 39 Ami agali haru haga mbira heagome handade ho hearia Yasu tongolo miyagola hondowa lalu, Agali ogoni ibu Ngode Datagaliwabe Igini heneneoreda, lene.

40 Magadala wali Meribi Yamese mende Yosesela ai̱ya Meribi Salaumibi wali maru heba emene kaundia howa handa amu ho hene. ^m 41 Ala Yasu Galilini hayangi wali urunime ibu poradagua puwa biamogo biaga berene. Wali maru dewa Yasu heba Yarusaleme ibiyaru tibi de hendene.

Yasu tingini horo henego ogo

(Madiu 27.57-61, Lugu 23.50-56, Yone 19.38-42)

42 Ni palue dadai biyagolaSabada horo kaware howa tomo dawa manda manda bulene wini. ⁿ 43 Ogoningi ArimadiaGanisolo agali Yosebe ibu mini bayalewi henego ibu Ngode Datagaliwabehanda Handame Ho Holene tu helo hondo henego ibugua gi nahe elahe howa Pailate hearia puwa lalu, Yasu tingini mule poabe, lene. 44 Ani layagola Pailatehanda ibuni manda bialu abale tongo layabe nalebe manda nabi hene. Manda nabi howa ami haru haga biago olowa ibuhondo lalu, Ibu abale tongolo miyabe, lene. 45 Ani layagola ami haru haga biagome, Abale tongolo miya, lamiyagola Pailatehanda Yosebehondo, Yasu tingini mo pu, lene. 46 Mo pu, layagola Yosebe ibu labolabo pele bayaleore mbira yolo buwa mo winigome Yasunaga tingini ira bangani howa mo yalu daluwa labolabome mo kabu bini. Ani buwa ege andaha ala guabu winigo ogoniha hora howa ege to̱le̱ timbunime paya anda hene. 47 Ani bialu hearia Magadala wali Meribi Yosese ai̱ya Meribi libu Yasu hora heagoria de hendene.